Name: Hafa þær einhverju breytt? Málþing um kvenhetjur í sögum Steinunnar Sigurðardóttur
Start: 2025-09-15T16:30:00+00:00
End: 2025-09-15T19:00:00+00:00
Location: Edda - hús íslenskunnar

$Hafa \u00fe\u00e6r einhverju breytt? M\u00e1l\u00feing um kvenhetjur \u00ed s\u00f6gum Steinunnar Sigur\u00f0ard\u00f3ttur$

Í tilefni af endurútgáfu skáldsögunnar Ástin fiskanna, í ritröðinni íslensk klassík, stendur Bókmennta- og lisftfræðastofnun Háskóla Íslands í samstarfi við Forlagið fyrir málþingi þar sem sjónum er beint að kvenhetjum í skáldsögum og sannsögum Steinunnar Sigurðardóttur.
Málþingið verður haldið í fyrirlestrasal Eddu, mánudaginn 15. september kl. 16:30-19:00. Húsið opnar kl. 16:30 en dagskrá hefst kl. 17:00. Umræðustjóri verður Freyr Eyjólfsson.
Stuttar framsögur flytja:
- Alda Björk Valdimarsdóttir um Öldu í Tímaþjófinum
- Ástráður Eysteinsson um Samöntu í Ástinni fiskanna
- Gunnar Snorri Gunnarsson um Vigdísi forseta í Ein á forsetavakt
- Guðrún Steinþórsdóttir um LínLín í BÓL og Lillu í Sólskinshesti
- Halldór Guðmundsson um Hörpu í Hjartastað
- Rúnar Helgi Vignisson um Heiðu fjalldalabónda
- Viðar Hreinsson um Systu í Systu megin
Persónusköpun Steinunnar hefur markað djúp spor í íslenskar bókmenntir allt frá upphafi skáldsagnaferils hennar. Kvenhetjur hennar, hvort sem um er að ræða skáldskap eða sannsögur, endurspegla víddir íslensks samfélags, menningar og sjálfsmyndar. Á málþinginu verður rætt um hinar innbyrðis ólíku kvenhetjur í verkum Steinunnar, frá Öldu í Tímaþjófinum og Samöntu í Ástinni fiskanna til Heiðu fjalldalabónda og Vigdísar forseta og hlutverk og áhrif þeirra í bókmenntasögulegu og menningarlegu samhengi.
Steinunn Sigurðardóttir hefur á löngum og sérlega fjölbreyttum höfundarferli sent frá sér jöfnum höndum skáldsögur og ljóðabækur, auk sannsagna, smásagna, barnabókar og leikrita.
Hún hefur hlotið margvísleg verðlaun og viðurkenningar fyrir ritstörf sín, þar á meðal Íslensku bókmenntaverðlaunin öðru sinni fyrir BÓL, Verðlaun Jónasar Hallgrímssonar, Ljóðaverðlaun Guðmundar Böðvarssonar og Fjöruverðlaunin. Þá hefur Háskóli Íslands sæmt hana heiðursdoktorsnafnbót. Verk hennar hafa verið þýdd víða og vakið alþjóðlega athygli og margar skáldsögur hennar teljast sígildar.
Umræðuþingið er öllum opið og orðið er viðstöddum frjálst.