Advertisement
Hvað: Veisla þar sem fólk kemur saman og gleðst yfir útgáfu nýrrar bókar. Þar verða stutt ræðuhöld og gestum mun gefast tækifæri á að skoða bókina og ræða við höfunda.Hvar: Bóksala stúdenta, Háskólatorgi, Sæmundargata 4, 102 Reykjavík
Hvenær: 6. mars á milli 3:45 og 5 eftir hádegi (15:45 - 17:00)
Út er komin bókin Fötlun, sjálf og samfélag: Birtingarmyndir og úrlausnarefni í ritstjórn Snæfríðar Þóru Egilsson, prófessors í fötlunarfræði við HÍ.
Bókinni er ætlað að varpa ljósi á líf og félagslegar aðstæður fatlaðs fólks hér á landi í ljósi gagnrýninna kenninga og íslenskra rannsókna á sviði fötlunarfræði. Athygli er beint að helstu viðfangs- og úrlausnarefnum ólíkra æviskeiða og að flóknu samspili félagslegra, efnislegra og stofnanabundinna hindrana sem skapa og viðhalda fötlun og torvelda fötluðu fólki að lifa góðu lífi. Kaflarnir tólf veita greinargóða innsýn í þróun fræðasviðsins síðustu ár og áratugi en höfundar efnis eru rannsakendur sem beint hafa sjónum að ólíkum sviðum innan fötlunarfræði.
Bókin er ætluð til kennslu í háskólum en getur einnig gagnast fötluðu fólki, fjölskyldum þess, hagsmunasamtökum fatlaðs fólks, þjónustuveitendum og stefnumótandi aðilum. Höfundar bókarinnar vænta þess að efni hennar og umfjöllun veki fólk til umhugsunar og leiði til aðgerða sem dragi úr aðgreiningu og stuðli að félagslegu réttlæti, jákvæðum viðhorfum, bættu aðgengi og betri þjónustu.
Háskólaútgáfan gaf bókina út.
Útgáfuhófið er haldið í tengslum við menningarhátíðina Uppskeru sem fer fram í Reykjavík dagana 8. febrúar til 8. mars 2025. Tilefni hátíðarinnar er 20 ára afmæli fötlunarfræða við Háskóla Íslands. Hátíðinni er ætlað að vekja athygli á framlagi fræðafólks, samtaka fatlaðs fólks og fatlaðs listafólks til íslenskrar menningar.
Lykilviðburðir hátíðarinnar verða tveir, málþing í Háskóla Íslands 21. febrúar og menningarhátíð í Hörpu 22. febrúar. Auk þess verða viðburðir víðs vegar um borgina þar sem gestum gefst tækifæri á að njóta listsköpunar fatlaðs fólks. Í boði verður myndlistasýning, kvikmyndasýning, bókmenntakvöld, gjörningakvöld, ljóðakvöld, smiðjur auk viðburða á söfnum borgarinnar.
Dagskráin verður aðgengileg á auðlesnu máli og allir viðburðir táknmálstúlkaðir. Í Hörpu verður rittúlkun á ensku og sjónlýsing á íslensku og ensku. Hátíðin er öllum opin að kostnaðarlausu.
Verið öll velkomin á Uppskeru!
hi.is/uppskera
Tungumál: Íslenska og íslenskt táknmál
Aðgengi: Háskólatorg er með salerni aðgengileg fólki sem notar hjólastóla. Fyrir utan eru bílastæði merkt fyrir fatlað fólk.
Strætó: Strætisvagnar sem stoppa í grennd við Háskóla Íslands eru nr. 1, 3, 6 (stoppistöð Háskóli Íslands) og 12 (Stoppistöð Þjóðminjasafnið).
Advertisement
Event Venue & Nearby Stays
Bóksala Stúdenta, Reykjavík, Iceland
