Advertisement
Nú stundar til stóra dagin. Hvør man hava glett seg mest? Børn ella vaksin? Havnarfólk ella bygdarfólk? Ítróttafólk ella tónleikarar? Svarið er helst ‘øll sum ein’. Í vikuni fara tær stóru maskinurnar stillisliga trillandi av staðnum, og arbeiðsfólkini tveita handskar og hjálmar frá sær. Tá er bert eftir at handa leiðsluni við Tjarnir lykilin til stórhøllina.
Í hesum sambandi verður stórt upplatingartiltak leygardagin 15. februar kl. 11, har ið øll eru boðin til opið hús.
Á gólvinum verður nógv at síggja: Ítróttafólk úr ítróttagreinum so sum hondbólti, fimleiki, kurvabólti, frælsum ítrótti, inniróðri, jiu-jitsu, flogbólti, darti, fótbólti og badminton fara at royna nýggja gólvið og vísa kynstur. Vitjandi sleppa eisini at royna seg – kravið er tó sjálvandi, at mann hevur innanduraskógvar við.
Tendrað verður eisini fyri stóra skíggjanum undir loftinum, so hvør veit, um tú, ella onkur tú kennir, knappliga verður at síggja á skíggjanum.
Sølubúðirnar bjóða pylsur, sodavatn og annað, og í matsøluni ‘í Føgrulíð’ kunnu vitjandi njóta ein kaffimunn og eitt kakustykki.
Upplatingartiltakið verður leygardagin 15. februar frá kl. 11 til 17.
Advertisement
Event Venue & Nearby Stays
við Tjarnir, 188 Hoyvík, Tórshavn, Faroe Islands
