Advertisement
Sif Margrét Tulinius fiðluleikari og Richard Simm píanóleikari hafa starfað um árabil sem einleikarar og tekið þátt í flutningi á kammertónlist, hérlendis og erlendis. Þau stilla nú saman strengi sína í stórbrotinni efnisskrá með verkum eftir César Franck og Ludwig van Beethoven. Á undan tónleikunum, kl. 13, verður boðið upp á tónleikaspjall í fordyri Salarins þar sem skyggnst verður inn í efnisskrá dagsins.
Tónleikarnir eru samstarfsverkefni Salarins og FÍT-klassískrar deildar FÍH.
**
EFNISSKRÁ
Ludwig van Beethoven (1770 - 1827)
Rómansa fyrir fiðlu og píanó (úts. Richard Simm)
César Franck (1822 - 1890)
Sónata fyrir fiðlu og píanó
I. Allegretto ben moderato
II. Allegro
III. Recitativo -Fantasia. Ben moderato - Molto lento
IV. Allegretto poco mosso
HLÉ
Ludwig van Beethoven
Kreutzer-sónatan, sónata nr. 9 fyrir píanó og fiðlu
I. Adagatio sostenuto - Presto
II. Andante con variazioni
III. Finale. Presto
**
Fiðlusónata César Franck er á meðal vinsælustu verka sem samin hafa verið fyrir þessa hljóðfæraskipun, hádramatísk og ótrúlega áhrifamikil en verkið gerir miklar kröfur til beggja hljóðfæraleikara. Belgíska tónskáldið César Franck samdi hana fyrir samlanda sinn, fiðlusnillinginn Eugène Ysaÿe sem frumflutti árið 1886 ásamt píanóleikaranum Marie-Léontine Bordes-Pène.
Kreutzer-sónatan var frumflutt árið 1803 af fiðluleikaranum George Bridgetower og Beethoven sjálfum. Síðar átti Beethoven eftir að tileinka sónötuna Rodolhpe Kreutzer sem var á meðal fremstu fiðluleikara Evrópu í upphafi 19. aldar. Líkt og sónata Franck býr Kreutzer-sónatan yfir ótrúlegum áhrifamætti og djúpri fegurð en verkið tekur um 40 mínútur í flutningi þar sem bæði hljóðfærin skipa gríðarstóran sess.
**
Um flytjendur:
Sif Margrét Tulinius fiðluleikari lauk einleikaraprófi frá Tónlistarskólanum í Reykjavík vorið 1991. Hún hlaut Fulbright styrk til frekara náms í Bandaríkjunum og lauk B.A.-gráðu með láði frá Oberlin háskóla í Ohio og síðar meistaragráðu frá New York. Að námi loknu fluttist Sif til Evrópu og lék ásamt ýmsum tónlistarhópum á fjölmörgum tónlistarhátíðum víðs vegar um heiminn; má þar m.a. nefna New York Symphonic Ensemble í NY og Japan, Ensemble Modern í Frankfurt og Münchener Kammerorchester.
Sif hefur komið fram sem einleikari með Sinfóníuhljómsveit Íslands m.a. í flutningi á fiðlukonserti Gubaidulinu, Fylgjum Þorkels Sigurbjörnssonar og Partitu eftir Lutoslawski. Hún hefur tekið virkan þátt í flutningi nútímatónlistar og frumflutti nýverið íslensk einleiksverk sem samin voru sérstaklega fyrir hana. Þessi tónverk eru væntanleg til útgáfu á árinu 2024.
**
Richard Simm er fæddur í Newcastle á Englandi og hefur verið búsettur á Íslandi um langa hríð. Hann nam við Royal College of Music í London hjá Bernard Roberts og við Staatliche Hochschule für Musik í München hjá Erik Then-Bergh. Hann vann til fjölmargra verðlauna á námsárum sínum, fékk þar á meðal tvenn verðlaun fyrir túlkun sína á verkum Chopin. Richard hefur haldið tónleika í Wigmore Hall og Purcell Room í London og hefur auk þess komið fram á ótal tónleikum í Þýskalandi, Bandaríkjunum og á Íslandi, þar sem einleik hans hefur verið lýst sem einu af best geymdu leyndarmálum landsins.
Tónleikarnir eru samstarfsverkefni Salarins og FÍT-klassískrar deildar FÍH
Advertisement
Event Venue & Nearby Stays
Salurinn Tónlistarhús, Hamraborg 6, 200 Kópavogsbær, Ísland,Kópavogur, Kopavogur, Iceland
Tickets
