Name: Det stille ropet
Start: 2026-05-07T09:00:00+02:00
End: 2026-05-07T15:30:00+02:00
Location: Radisson Blu Royal Hotel, Bergen (Bergen, Norway)

Konferansen skjer både fysisk og digitalt.
Pris: 690,-
🎯Tema:
"Identitet og kultur: Korleis forstå seg sjølv og andre når orda ikkje finst."
I mange etniske minoritetar er sjølvmord sterkt stigmatisert. Det gjer det ekstra vanskeleg for oss som ønsker å hjelpe menneske som kan vere i fare for å ta livet sitt, eller som har mist ein nærtståande i sjølvmord.
På konferansen vil LEVE Hordaland, LEVE Sogn og Fjordane og RVTS Vest ta opp desse utfordringane. Deltakarane får innsikt i kvifor dette eir eit krevande tema, og kva vi kan gjere for å vere gode og nyttige hjelparar.
Konferansen vil òg belyse utfordringane adopterte møter, og gi kunnskap om kva denne gruppa treng.
Bekrefta forelesarar:
🎤Farhan Shah
Farah skal snakke om korleis sjølvmord kan og bør forståast frå eit ikkje-medisinsk perspektiv for å spegle det kulturelle mangfaldet i det norske samfunnet. Deretter tar han for seg sorga sine ulike uttrykksformer, og korleis kultursensitive hjelpetenester kan møte og romme sorga til etniske minoritetar i Noreg.
Farhan Shah er filosof med doktorgrad frå Universitetet i Oslo. Han er ein aktiv føredragshaldar om mennesket sitt sjølvdestruktive potensial i ei eksistensfilosofisk, psykoanalytisk og dekolonial belysning. Shah er òg kaptein og feltimam/chaplain i Forsvaret sitt tros- og livssynskorps ved Sessvollmoen garnison.
🎤Mwamini Ali-Sivertsen
Mwamini er familieterapeut ved Bergen og Omland familiekontor, og etterlatt etter sjølvmord. I dette føredraget deler Mwamini si personlege historie som etterlatt, og korleis denne livshendinga har prega og forma arbeidet hennar som terapeut. Med utgangspunkt i masteroppgåva si belyser ho korleis sorg etter sjølvmord påverkar familierelasjonar, og korleis terapeutar kan møte etterlatne familiar med støtte og forståing. Ho viser korleis open dialog, emosjonell tilgjengelighet og profesjonell hjelp kan bidra til at familiar finn måtar å leve vidare med sorga – saman.
🎤Abid Raja
Abid er politikar, forfattar og samfunnsdebattant. Han vil dele si personlege historie om oppvekst, frigjering og håp. Abid formidlar ikkje politikk frå scena, men universelle erfaringar knytt til utanforskap, motstand og det å finne sin eigen veg. Abid vil berøre, engasjere og gi publikum rom for refleksjon – uavhengig av bakgrunn og livssituasjon. Abid har sjølv vore ærleg om dei høge kostnadene ved å stå i spagat mellom det norske og pakistanske miljøet, og kan slik formidle betre enn dei fleste om konferansens tema.
🎤Diana Patricia Fynbo
Diana er utdanna barnehagelærar med fordjuping i spesialpedagogikk og har lang erfaring med å jobbe med barn og unge innanfor ulike institusjonar. Jobbar som lærar i barneskulen og har ei vidareutdanning i psykisk helsearbeid med barn og unge. I tillegg har ho vore med på å opprette Norsk-Colombianos Forening (NCF), ein foreining av og for adopterte frå Colombia. Ho er også ein av grunnleggarane av Adopsjon i endring (AiE) – Ressurssenter for adopterte og deres familier.
🎤Sandra Haukaas
Sandra blei adoptert frå Brasil som seksåring. I dag jobbar ho som miljøarbeidar med vidareutdanning innan psykisk helse og rus, er mamma til to og aktiv i likepersonsarbeid gjennom Facebook-gruppa AdopterteSammen. Med eigne erfaringar som adoptert i møte med psykisk helsetenester, er ho oppteken av å løfte adopterte sine perspektiv i møte med hjelpeapparatet.
🎤Ingrid Bernsen
Ingrid vart født i Noreg, adoptert bort og vaks opp i ein adoptivfamilie. Ho skal prate om korleis mange adopterte opplever tap av identitet, manglande openheit om bakgrunn og forventningar om tilpassing. Ho vil løfte fram dei utfordringane som oppstår når ein veks opp utan språk eller rom for å snakke om at ein er adoptert, og korleis dette kan påverke sjølvforståing og tilhøyrsle. Ingrid er utdanna eq-terapeaut og driv i tillegg likepersonsarbeid saman med andre adopterte. Dei siste to åra har ho vore med å drive lågterskel gruppe for adopterte.