Name: Ókominn slóði: Opnun sýningar Styrmis Arnar Guðmundssonar á Torginu í Neskirkju
Start: 2025-12-14T11:00:00+00:00
Location: Neskirkja

$\u00d3kominn sl\u00f3\u00f0i: Opnun s\u00fdningar Styrmis Arnar Gu\u00f0mundssonar \u00e1 Torginu \u00ed Neskirkju$

Ókominn slóði
Styrmir Örn Guðmundsson
Styrmir sýnir flennistórar teikningar af gáttum að veraldlegum víddum, áþreifanleg og sjónræn upplifun, vitnisburður um takmarkalausa möguleika mannlegs ímyndunarafls.
Dagskráin hefst í kirkjuskipinu þar sem fjallað verður um verkin. Að því loknu förum við á Torgið þar sem við virðum verkin fyrir okkur og listamaðurinn flytur tónlistargjörning.
Í teikningum sínum reynir Styrmir ekki að teikna umhverfið eins og hann sér það heldur fer á hugarflug um það svo úr verður umhverfi eins og úr öðrum heimi.
Svartar, litríkar og andlegar myndirnar umlykja áhorfandann svo það er líkt og hann geti gengið inn í myndirnar. Þegar pensilstrokur og bleklínur Styrmis dansa um pappírinn enduróma þær hrynjanda tilverunnar sjálfrar – síbreytilegar, ógnvænlegar og hrífandi.
Líkt og í fyrri verkum sínum segir Styrmir sögur með teikningunum sem eru gjarnan kosmískar, yfirskilvitlegar og jafnvel dularfullar. Styrmir er stórhuga sagnamaður og ólíkindatól sem veltir fyrir sér hinu fjarstæðukennda í lífinu sem og dauðanum. Listamaðurinn lítur á gáttirnar sem myndbirtingu upplifana fólks sem hafa komist í nálægð við dauðann.
Styrmir (1984) iðkar ýmis form listar. Einkum og sér í lagi teikningu, skúlptúr, gjörning og tónlist. Hann nam við Gerrit Rietveld Akademie í Hollandi á árunum 2005-2012. Nú býr hann á Íslandi en á árunum 2005-2024 bjó hann í Amsterdam, Varsjá og Berlín.