Advertisement
Fimthiamnak ChimtuRev. L. Khen Cham Tuanbia (Surkhua)
(B.A; B.D)
Rev. L. Khen Cham cu Surkhua Thianhlun phun Lian Kar chung Pu Sang Dun, Chuncung Pu Hrang Pawng i fanu Pi Cer Chin nih an hrinmi fanu le fapa hleikhat chungah paruknak a si i 1955 kum July 9 cacawn ni 6 a chuak. Amah cu Surkhua sianginn ah Lai ca a cawng i tang 4 teinak a hmuh hnu ah Surkhua state Middle School in tang 7 teinak a hmuh i tanghra tu cu Hakha ah teinak a hmu. Tanghra teinak a hmuh hnu cun Surkhua Sianginn ah 1976 kum in 1978 kum tiang private cachimtu (saya) a uan. Mah hnu cun Mandalay university ah a kai i 1983 kum ah B.A. Degree a la. Amah cu ca chimtu (saya) rian a uan in cun saya Khen Cham tiah auh a si.
Saya Khen Cham cu Surkhua Sianginn ah private saya a uan hnu cun 1979 kum in Hakha Party Unit zung ah a lut i Lothlobu (တောင်တူလယ်သမား အစည်းအရုံး) ah cazi rian kum 9 a uan. Hakha Party Unit zung cu 1988 kum ah a rawh caah cozah nih JAT rian an pek i Surkhua state Middle school ah 1989 kum in a lut i saya rian a uan.
Saya Khen Cham cu meithal tlaihlei ah huamnak (ဝါသနာ) a ngeih caah 1993 kum i Surkhua Aukang lopil tlak lio 10 lo duahnak ah Sakhan a bawh i lomei nih a pumpalukte in a hliam dih. A nung dingin a ho hmanh nih an ruat lo. Asinain Pathian le siibawite le saya/mah te zohkhenhnak thawngin duhsah tein a hung dam ciahmah i siizung ah thlathum khengte a kuah hnu ah a hung dam han.
Saya Khen Cham cu meihma in siizung i a tuar lio ah Pathian sin thla a cam bikmi cu, "Maw Pathian, hi ka meihma in na ka damter han a si ahcun na rian thiang uantu ah ka pum kaa pe lai" tiah a cam tawn. A taktak ah a hung dam i Pathian sin a biakam te bang India ram Sarampore ah Bible Sianginn ETC in Jorhat ah Bible sianginn cu a kai i 2000 kum, amah kum 45 a tlin ah B.D degree a lak han. Mah Bible Sianginn a tum cangka 2000 kum May 16 in Surkhua Tipil Khrihfabu nih an pastor ah an lak i pastor rian cu a uan colh. Mah hnu cun Pastor L. Khen Cham tiah auh a si han.
Pastor L. Khen Cham cu Surkhua Tipil Khrihfabu nih Senthang Baptist Association ah ordination pekpiak dingin an hal caah 2004 kum ah SBA Trienial Meetingpi cu Sakta khua ah an tuah i mah caan ah cun ordination cu an pek. Mah hnu cun Rev. L. Khen Cham tiah auh a si han.
Pastor L. Khen Cham cu Ordination a hmuh hlan 2002 kum ah CACC Unit 11 ES ah an thim i kum 7 chung 2009 tiang a uan. Amah cu Lai ca hanchonak caah fakpi in a si khawh chung aa zuammi a si. Amah a uan chungah Lai ca cawnnak lawng si loin kan Bible cathiang remnak le kan khrihfabu remhnak ah Committee lu bik a tuan i a caan tam deuh cu hi rian pithum hna uannak ah a hmang khomi rianuantu ha a si. Amah a uan chungah Khrihfa hlabu zalsanh zong hi amah hruainak in hun chuah a si. A cungah ho paoh kan i lawm cio.
Rev. L. Khen Cham hruainak in CACC rian pitum a uan pah cun Senthang miphun fimthiamnak cawisannak caah "Za Ling A" Education Centre cu SBA min in kum 3 chung chairman a uanpiak hna. Rev. L. Khen Cham cu CACC i a rian in aa dinh hnu ah a Khrihfabu a simi Surkhua ah a kir i Senior Pastor a uanpiak hna. Rev. L. Khen Cham cu Pastor rian a uan pah in Shalom Foundation nih Chin State Co. Ordination ah an thim i a uan pah. Mah a uan pah cun Peac & Transquality Committee chungtel a kep chih fawn. Cu lengah Fimthiamnaklei Riantuan Hlun pawl i komhnak cu 2008 kum June 22 ni in thawk a si i amah cu mah bu i "Founder pakhat" ah aa tel. Cu caah ဟားခါးမြို့ပညာရေး ဝန်ထမ်းဟောင်းများ မိသာဟာယအဖွဲ့ (Educational Retiree Fellowship) caah bochanmi hruaitu pakhat a si.
Rev. L. Khen Cham cu damlonak nih a phanh ve i 2011 kum April 18 ni in Asia Towwin Clinic ah a lut i a lu ah a bomi an hmuh caah April 22 ni ah opration an tuah. Thluak cancer si loin Kaadang in a rak vakmi a si an ti i C.T. an thlak han tikah a cuap ah an hmuh han. Cucaah Taunggyi siizungpi ah May 1 ni in thlakhat chung mei in an em i June 1 ni in SSC Shwekungdaing siizung ah cancer sii in thla 3 chung an thlop han. Mah hnu cun a ha deuh i Hakha ah a tlung. Zarhnih hnu ah a zawtnak a puang han i Hakha siizung ah thla 3 chung aa thlop nain a dam khawh ti lo ruangah a inn ah an inpi i 2011 kum November 24 ni zing suimilam 9:20 a rian a uanpiakmi a pa sinah thadam tein aa din.
Rev. L. Khen Cham cu Phaipha khuami Pu Tial Ling le Pi Ngun Par i an fanu upa bik Pi Bawi Tial he an i um i fanu pahnih le fapa pahnih an ngei i ngakah in a rohtak hna.
Reff. Fimthiamnak Chimtu Mi Hmasa Hna
(Cauk)
Advertisement
Event Venue & Nearby Stays
Kampung Kebun Bunga, Selangor, Malaysia, Shah Alam, Malaysia
